Fáilte go
Dún na nGall
Cá bhfuil an cúrsa?
I nGort a’ Choirce, i gceantar Chloich Cheann Fhaola atá Coláiste Bhrian Bóramha agus ba sa cheantar seo ag tús an chéid seo caite a bunaíodh an chéad choláiste Gaeilge i gCúige Uladh d’fhonn oiliúint a chur ar ábhair oidí. Is mian linn mar sin cúrsa a chur ar fáil a thabharfaidh spreagadh d’ábhair oide agus a chinnteoidh go bhfaighidh siad áiméar ar an Ghaeilge a shealbhú i gceantar Gaeltachta.
Ár gcuid spriocanna
Ag deireadh an chúrsa tá muid cinnte:
Go mbeidh tuiscint ag ár gcuid mac léinn ar cheartúsáid na Gaeilge.
Go mbeidh dearcadh dearfach acu i leith na teanga.
Go mbeidh siad muiníneach ag teagasc na Gaeilge sa tseomra ranga bunscoile.
Go mbeidh na scileanna cuí acu le hacmhainní Gaeilge a chruthú.
Go mbeidh tuiscint agus léargas acu ar shaibhreas oidhreachta na Gaeltachta lena n-áirítear, teanga, ceol, amhránaíocht, damhsa, béaloideas, drámaíocht, & scéalaíocht.
Go gcuirfidh siad snas agus craiceann ar a gcuid scileanna cumadóireachta.
Gur doimhne agus gur leitheadaí an t-eolas a bheidh acu ar shaíocht na Gaeltachta.
Ábhar na gceachtanna
I ranganna na maidine díreofar ar cheartúsáid na Gaeilge agus ar scileanna teanga na mac léinn a fhorbairt. Beidh deiseanna ag mic léinn páirt ghníomhach a ghlacadh i gcomhráite ina bpléitear réimse leathan topaicí agus tabharfaidh siad faoi thascanna a chuirfidh an dlaoi mhullaigh ar a gcuid Gaeilge.
Treisítear obair na maidine sna himeachtaí tráthnóna agus oíche mar a mbeidh deis ag mic léinn a bheith rannpháirteach in iliomad imeachtaí a thabharfaidh áiméar dóibh barr feabhais a chur ar a gcuid Gaeilge labhartha i suímh neamhfhoirmeálta. Beidh siad in ann:
Spórt a imirt.
Acmhainní a chruthú a chuideoidh leo sa tseomra ranga.
Ceol & Ámhránaíocht atá curtha in oiriúint do pháistí bunscoile a fhoghlaim.
Damhsaí Céilí & Damhsaí Seit atá curtha in oiriúint do pháistí bunscoile a fhoghlaim.
Éisteacht le haoichainteoirí a osclóidh doras feasa á n-oidhreachta dóibh.
Amchlár an Lae
Bricfeasta: 9:00am
Ranganna Gaeilge
Ranganna cumarsáideacha a bhéas ann ina ndéantar forbairt ar scileanna teanga na mac léinn. Tá súil againn go bhfaighidh mic léinn smaointe agus eolas ar straitéisí múinte Gaeilge a chuideoidh leo ina seomraí ranga féin.
Am Dinnéir: 1:00pm - 3:00pm
Seisiún Tráthnóna
Caithfear an tráthnóna i mbun imeachtaí spraíúla éagsúla a chuireann béim ar úsáid na teanga, lasmuigh den tseomra ranga.
Tá muid ag súil go mbeidh na mic léinn in ann na scileanna a shealbhóidh siad le linn na seisiún seo a úsáid sa tseomra ranga amach anseo.
Am Tae: 3:00pm - 5:00pm
Imeachtaí Oíche
Bí páirteach in imeachtaí cultúrtha a spréagann cumarsáid trí Ghaeilge agus a thugann deis do mhic léinn a bheith ag comhoibriú le chéile agus ag baint sult as an teanga.
Eolas breise
Eolas faoi thaisteal
Ag taisteal ar bhus go Gort a’ Choirce
Is féidir taisteal ar bhus John McGinley (John McGinley Coaches), ó Bhaile Átha Cliath go Gort a’ Choirce. Tá stadanna bus i mBaile Átha Fhirdhia agus i Muineachán fósta. Féach ar shuíomh gréasáin McGinley’s Coaches mar a bhfaighidh tú gach eolas. Ní mór suíochán a chur in áirithe ré agus a rá go mbeidh mála mór leat.
Ag tuirlingt den bhus i nGort a’ Choirce:
Ionad Fágála: Os comhair Óstán Loch Altan
Ag taisteal i gcarr:
Má tá tú ag taisteal i gcarr buailfidh muid leat ag Halla na Paróiste (F92 PR86) idir 4pm - 6pm.
Ionad: Ranganna & Imeachtaí
An Luan - An Satharn
Bíonn ranganna maidine agus tráthnóna ar siúl i Halla na Paróiste, Gort a’ Choirce (F92 PR86)
Lóistín
Fanann mic léinn i dtithe atá aitheanta ag An Roinn Turasóireachta, Cultúir, Ealaíon, Gaeltachta, Spóirt & Meán. Déanfar gach dícheall cairde a chur le chéile. Ní mór ainmneacha do chairde a scríobh síos ar an fhoirm iarratais thíos.
Óstán Loch Altan
Ionad Pobail: Community Centre
Táillí
€800
Cludaíonn an costas seo múineadh, imeachtaí, achmhainní agus taisteal le linn na gcursaí. Ní chludaíonn sé taisteal lasmuigh d’imeachtaí na gcúrsaí.
Líon isteach an fhoirm thíos le do chuid sonraí pearsanta a roinnt linn.
Ceisteanna a chuirtear go minic
-
Cúrsa Gaeilge sa Ghaeltacht d’ábhair oidí bunscoile an cúrsa seo. Ní mór do mhic léinn dhá chúrsa Gaeilge a dhéanamh sa Ghaeltacht mar chuid dá gclár staidéir.
Má tá tuilleadh eolais faoi aon ghné den chúrsa de dhíth ort cuir ríomhphost chuig colaistebb@gmail.com.